Азаматтық некенің шариғи үкімі қандай?

publisher

«Азаматтық неке» деп қыз бен жігіттің ерікті түрде бір-біріне лайықты екендігін сынау мақсатында некесіз қосылып, ата-ана, тума-туыстарына хабар бермей, бірнеше ай немесе бірнеше жыл бірге тұруын айтады. Кейбіреулер оны «еркін махаббат» немесе «іс жүзіндегі неке» деп те атайды. Азаматтық неке шариғатта некесіздікке жатады. Азаматтық некені зина деп те атауға болады. Себебі, азаматтық некеде неке қиылмайды. Үлкен күнә болып саналатын зинаны осылайша «ерлі-зайыпты болуға дайындық» деген желеумен өздерінше адал көреді. Харамды қанша адал көрсең де, ол адал болып кетпейді. Шариғи тұрғыдан азаматтық некенің мынадай зияндары бар. Олар:
1. Азаматтық неке зинаға жатады. Ал зина шариғатта үлкен күнә болып есептеледі. Алла Құран Кәрімде бұл жайында былай дейді: «Зинаға жоламаңдар. Өйткені, Ол анық арсыздық және жаман жол» [«Исра» сүресі, 32-аят].
2. Некесіз ұрпақ дүниеге келеді. Яғни, әлгі күнәні жасап жүргендер бір-бірімізге лайық емес екенбіз деген шешімге келсе, әрі әйелдің аяғы ауыр болып, бала дүниеге келсе, зинақордың баласы және әкесіз тірі жетім болып өседі.
3. Дүниеге келген сәби әкенің баласы болып есептелмейді. Зинақор әйелдің баласы болып саналады.
4. Сәбиді туған анасы жаман жүрісті әйел, ойнас деген лақапқа ие болады.
5. Отбасылық жауапкершіліктің жоқтығы. Негізінде ер азаматқа отбасын адал табыспен бағу, қомқор болу міндеті жүктеледі. Ал ұл-қыздың тәрбиесі, үй шаруашылығы әйелдің еншісінде. Ал, азаматтық некеде мұндай жауапкершіліктің иісі де жоқ. Олар бар болғаны бір-бірін сынау мақсатымен бір шаңырақтың астында есеппен өмір сүреді.
6. Жетесіз нәсілдің қалыптасуына септігін тигізеді. Себебі, қазақ жұрты өзінің тегін, ұлтын білмейтін ұрпақты, жеті атасын білмегенді «жетесіз» деп атаған.
Түйін: Жоғарыда келтірілген мәліметтер азаматтық некенің шариғи үкімінің харам екендігін көрсетеді.

ҚМДБ Шариғат және пәтуа бөлімі
www.fatua.kz

Пікір қалдыру

Әлеуметтік желі арқылы кіру: 

Э-пошта мекенжайыңыз жарияланбайды. Міндетті өрістер * таңбаланған

This site uses Akismet to reduce spam. Learn how your comment data is processed.

Келесі жазба

Дәстүрлі дін адамгершілік идеясына негізделеді

294 Қазақ халқы ғасырлар бойы ұстанып келген дәстүрлі Ислам діні қоғамда, мемлекетте тыныштықты, адамгершілікті, парасаттылықты насихат етеді. Алла Тағала адам баласын Құран Кәрімде: «Ол жаратылғандардың ішіндегі ең абыройлысы», – деп дәріптейді. Сондықтан, ата-бабаларымыз осы ұстанымды басшылыққа ала отырып, ұрпағын ізеттілікке, ізгілікке тәрбиелеген. Халқымыз ғасырлар бойы дінді руханияттың негізі санап келді. […]